वीरगञ्ज, २१ पुष । स्कर्पियोको ठक्करबाट तरकारी बेच्न निस्केका एकजनाको मृत्यु भएको छ भने अन्य दुईजना घाइते भएका छन् । बाराको जीतपुरसिमरा उपमहानगरपालिका वडा नम्बर १६ को टांगिया बस्तीका स्कर्पियोको ठक्करबाट तरकारी बेच्न निस्केका एक पुरुषको मृत्यु भएको हो । अन्य दुई महिला घाइते भएका छन् ।
पथलैया–निजगढ सडकखण्डअन्तर्गत पसाहा पुल नजिक बिहीबार बिहान निजगढबाट पथलैयातर्फ आउँदै गरेको सकर्पियोले सोही दिशाबाट आइरहेको मोटरसाइकल र साइकललाई एकै ठाउँमा ठक्कर दिँदा टांगिया बस्तीका ४५ वर्षीय राजेन्द्र माझीको घटनास्थलमै मृत्यु भएको थियो ।
दुर्घटनामा २८ वर्षीया सोनिया योञ्जन र रुपा आलेमगर घाइते भएका छन् । उनीहरुको सिमरास्थित अल्पाइन अस्पतालमा उपचार भइरहेको छ । घाइतेमध्ये आलेमगरको अवस्था गम्भीर छ । घाइते दुवैलाई थप उपचारका लागि वीरगञ्जको अस्पताल पठाउने तयारी भइरहेको छ ।
बिहानको समयमा तीव्र गतिमा आएको ग २ च ४४१३ नम्बरको सकर्पियोले पसाहा पुलदेखी पूर्वतर्फ प्रदेश २–०३ ००२प ४५८७ नम्बरको मोटरसाइकल र दुईवटा साइकललाई पछाडिबाट ठक्कर दिएको थियो । स्कर्पियोका चालकलाई प्रहरीले नियन्त्रणमा लिएको छ ।
