वीरगञ्ज, १९ बैशाख । पछिल्लो २४ घण्टामा पर्सा जिल्लामा १ सय ९ जना कोरोना संक्रमित थपिएका छन् ।
पर्सा जिल्लाका विभिन्न स्थानबाट संकलित १ सय ९२ जनाको थ्रोट स्वाबको नमुना परीक्षण गर्दा १ सय ४५ मा संक्रमण पुष्ठि भएको हो । बाराका २६ जना, रौतहटका ६ जना, सर्लाहीका ३ जना र महोत्तरीका १ जनामा संक्रमण देखिएको नारायणी अस्पतालका कोभिड संयोजक डा. सरोजरोशन दासले जानकारी दिए । थपिएका संक्रमितमध्ये ३० जना महिला रहेका छन् ।
१८ वर्षदेखि ६८ वर्ष उमेरसमुहका संक्रमित थपिएको डा. दासले बताए । डा. दासका अनुसार उनिहरुको सिटि भ्यालु १४.५ देखि ३४.८ सम्म रहेको छ । पर्साको बहुदरामाई, छिपहरमाई, कालिकामाई, सखुवाप्रसौनी गाउँपालिका र अधिकांश संक्रमितहरु वीरगञ्ज महानगरपालिकाका रहेका छन् ।
यस्तै आइतवार बिहान १ जना संक्रमितको मृत्यु भएको छ । वीरगञ्जस्थित नारायणी अस्पतालमा उपचाररत वीरगञ्ज महानगरपालिका वडा नम्बर १६ निवासी ६८ वर्षीय वृद्धको मृत्यु भएको हो । २ दिन अगाडी पिसिआर रिपोर्ट पोजेटिभ आएका बृद्धलाई सोही दिन अस्पताल भर्ना गरिएको थियो । गम्भिर किसिमको निमोनियासहित दीर्घ रोगिसमेत रहेको बृद्धको आइतवार बिहान १ बजे मृत्यु भएको अस्पतालका कोभिड संयोजक डा. दासले बताए ।
यसैगरी पछिल्लो २४ घण्टामा २१ जना कोरोना संक्रमित नारायणी अस्पतालमा भर्ना भएका छन् भने २ जनाको मृत्यु भएको छ । सोही अवधिमा ५ जना संक्रमित डिस्चार्ज भएका छन् भने १ जनालाई रिफर गरिएको नारायणी अस्पतालका चिकित्सक डा. सरोज सिँहले जानकारी दिए ।
हाल नारायणी अस्पतालमा ६३ जना सक्रिय संक्रमितको उपचार भइरहेको छ ।
