file photo
वीरगज, १६ बैशाख । निषेधाज्ञाको अघिल्लो दिन उपभोक्तालाई ठगी गर्ने ३ व्यापारीलाई वाणिज्य, आपूर्ति तथा उपभोक्ता संरक्षण कार्यालय वीरगञ्जले कारवाही गरेको छ ।
नयाँ भेरियन्टसहितको कोरोना भाइरसको संक्रमण व्यापक रुपमा फैलिएपछि जिल्ला प्रशासन कार्यालय पर्साले जारी गरेको निषेधाज्ञाको अघिल्लो दिन नै उपभोक्ता ठग्ने गरेको पाइएको हो । कार्यालयको बजार अनुगमन टोलीले वीरगञ्जको बजारमा छापा मारेर ३ व्यापारीलाई कारवाही गरेको हो ।
वीरगञ्ज महानगरपालिका वडा नम्बर १२ स्थित नमन किराना गल्ला भण्डारले मुल्य सूची नराखी कारोवार गरेको भन्दै ५० हजार रुपैया जरिवाता तिराइएको कार्यालयका सूचना अधिकारी दिलिप खङ्खत्वेले जानकारी दिए ।
त्यसैगरी वीरगञ्ज महानगरपालिका वडा नम्बर १० स्थित रक्षा भण्डार र वडा नम्बर ९ स्थित महादुर्गा एण्ड पुनम बस्त्रालयलले खरिद बिल नदेखाएको भन्दै १०÷१० हजार रुपैया जरिवाना तिराइएको हो । सूचना अधिकारी खङ्खत्वेका अनुसार तिनवटै पसलेलाई गरी ७० हजार रुपैया जरिवाना गरिएको हो ।
वाणिज्य, आपूर्ति तथा उपभोक्ता संरक्षण कार्यालय वीरगञ्जका निमित्त कार्यलय प्रमुख जीतबहादुर भण्डारीको नेतृत्वमा खटिएको बजार अनुगमन टोलीमा जिल्ला प्रशासन कार्यलय पर्सा, जिल्ला प्रहरी कार्यालय पर्सा, वीरगन्ज उद्योग वाणिज्य सँघ लगायतका प्रतिनिधिको पनि सहभागीता रहेको थियो ।
