वीरगञ्ज ९ असोज । वीरगञ्जस्थित नारायणी अस्पतालमा बिहीबार राति गरिएको परिक्षणको रिपोर्ट अनुसार पर्साका ११ र बाराका ४ जनागरी जम्मा १५ जनामा संक्रमणको पुष्टि भएको छ ।
थपिएको १५ जना संक्रमितहरुमध्ये १४ जना पुरुष र १ जना महिला रहेको नारायणी अस्पतालमा प्रवक्ता एवम् वरिष्ठ चर्म रोग विशेषज्ञ डाक्टर अतुलेशकुमार चौरसियाले जानकारी दिए ।
बिहीबार पर्साका १०३ जनाको स्वाबको नमुना परिक्षण गर्दा ११ जनामा संक्रमण देखिएको हो । पर्साका थपिएका संक्रमित वीरगञ्ज महानगरपालिकाका १० जना र छिपहरमाई गाउँपालिकाका १ जना रहेका छन् ।
यस्तै, छिपहरमाईको वडा नम्बर ५ मापनि एक संक्रमित थपिएका हुन् ।
उता, बाराको पचरौता, सिम्रौनगढ र आदर्श कोतवालका बासिन्दाहरुमा संक्रमणको पुष्टि भएको छ ।
पचरौता नगरपालिकाको वडा नम्बर ३ का एक जनामा संक्रमण देखिएको छ । त्यसैगरी, सिम्रौनगढ नगरपालिकाको वडा नम्बर ४ का एक जना संक्रमित भएका छन् भने आदर्शकोतवाल वडा नम्बर ५ का दुई जनामा संक्रमण देखिएको छ ।
बिहीबार बाराका २२ जनाको पिसिआर परिक्षण भएको थियो । पर्सा र बाराका नयाँ थपिएका संक्रमितको सिटी भ्यालु १८ देखि ३४ सम्म रहेको छ ।
